Tottenham 9 - 1 Wigan

Tottenham 9 - 1 Wigan

Mchezaji Jermaine Defoe wa Tottenham alifunga mabao matano kusaidia timu yake kuipa kipigo cha mabao tisa kwa moja Wigan.
Wengine waliofunga kwenye mechi hiyo ni Peter Crouch, Aaron Lennon na Niko Kranjcar huku kipa Chris Kirkland akijifunga mwenyewe.Bao la kufuta machozi la Wigan lilifungwa na Paul Scharner katika dakika 57.

Hii ni mara ya kwanza kwa timu kufunga mabao tisa katika mchezo wa ligi kuu ya soka ya England tangu Manchester United iwafunge Ipswich 9-0 katika uwanja wa Old Trafford mwaka 1995

Viongozi 60 duniani waitikia Copenhagen

Idadi inaongezeka ya viongozi ambao wanatarajiwa kuhudhuria mkutano wa kimataifa jijini Copenhagen kuhusu mabadiliko ya hali ya hewa na kuzua matumaini ya mafanikio.
Baadhi ya viongozi ambao wameonyesha nia ya kuelekea huko Denmark ni wale kutoka Uingereza, Ujerumani, Ufaransa, Uhispania, Australia, Japan, Indonesia na Brazil.

Haijulikani iwapo wenzao wa Marekani na Uchina watahudhuria.

Waakilishi kutoka nchi 192 wanatazamiwa kufika Copenhagen kujaribu kubuni mkataba mpya wa kudhibiti tabia nchi kuendeleza ule wa Kyoto uliozinduliwa mwaka 1997.

Hata hivyo kuna hofu ya kutopatikana kwa mwafaka wakati wa mkutano huo utakaoanza Desemba tarehe saba hadi 18.

Mwenyeji wa mkutano huo, Waziri Mkuu wa Denmark Lars Lokke Rasmussen alisema ili kupiga hatua, ni muhimu viongozi wa serikali kuhudhuria mkutano huo.

Kitson ajiunga na Boro kwa mkopo

Middlesbrough imemsajili mshambuliaji wa Stoke City, Dave Kitson kwa mkopo wa miezi miwili.
Anakuwa mchezaji wa tatu kusajiliwa na Boro kwa mkopo tangu meneja Gordon Strachan kuwasili kuifunza timu hiyo. Wengine waliosajiliwa kwa mkopo ni mshambuliaji Marcus Bent na kiungo Isaiah Osbourne.

Bent amekwishapachika mabao mawili tu katika michezo 25 ya Ligi Kuu tangu alipojiunga na timu hiyo akitokea Reading mwaka 2008.

Kitson huenda akacheza mechi yake ya kwanza siku ya Jumamosi dhidi ya Nottingham Forest.

Arsenal yasubiri majibu ya kuumia Gibbs

Kieran Gibbs anasubiri majibu ya vipimo vya X-ray baada ya kuumia alipoichezea England dhidi ya Lithuania chini ya umri wa miaka 21.
Mlinzi huyo wa kushoto wa Arsenal aliumia kiwiko cha mguu wa kuume na kulazimika kutolewa nje dakika ya 21 England walipocheza kuwania kufuzu ubingwa wa Ulaya kwa vijana walio na umri wa miaka chini ya 21 huko Vilnius.

Siku ya Jumatano alifanyiwa uchunguzi na daktari wa Arsenal.

Gibbs, mwenye umri wa miaka 20, amekuwa akicheza badala ya Gael Clichy aliyeumia mgongo katika nafasi ya ulinzi wa kushoto.

Msemaji wa chama cha soka cha England ameiambia BBC haionekani kama Gobbs ameumia vibaya kiwiko cha mguu.

Lakini iwapo Gibbs mzaliwa wa Lambeth atalazimika kukaa nje ya uwanja kutokana na tatizo hilo, inaweza kumpa matatizo makubwa meneja wa Arsenal, Arsene Wenger kwa upande wa ulinzi.

Ronaldo tayari kuanza mazoezi

Cristiano Ronaldo huenda akaanza mazoezi kamili na timu yake ya Real Madrid siku ya Ijumaa akiwa amepona kiwiko cha mguu.
Mshambuliaji huyo wa zamani wa Manchester United aliumia walipocheza na Marseille tarehe 30 mwezi wa Septemba na amekosa michezo tisa kwa timu yake ya Real Madrid.

Baada ya kufanyiwa uchunguzi siku ya Jumanne ameruhusiwa kuanza mazoezi ingawa klabu yake haijatamka ni lini ataanza kucheza.

Afisa wa Madrid Emilio Butragueno, amesema wanahitaji kumchunguza kila siku na madaktari ndio wataamua.

Kuumia kwa Ronaldo pia kulimfanya akose kucheza michezo miwili ya timu yake ya taifa ya Ureno, kuwania kufuzu Kombe la Dunia dhidi ya Bosnia-Hercegovina.

Tunisia yafukuza kocha wa soka

Mwalimu wa timu ya soka ya taifa ya Tunisia Humberto Coelho raia wa Ureno, ametimuliwa baada ya nchi hiyo kutofuzu Kombe la dunia mwaka 2010 Afrika Kusini.
Faouzi Benzarti, mwalimu wa vigogo wa soka wa Tunisia Esperance, ndiye atachukua hatamu za kuionoa timu ya taifa ya nchi hiyo kwa ajili ya mashindano ya Kombe la Mataifa ya Afrika mwaka 2010 Angola.

Kumekuwa na kelele nyingi za vyombo vya habari vya nchi hiyo pamoja na raia wa Tunisia dhidi ya Coelho tangu walipofungwa bao 1-0 na Msumbiji mjini Maputo siku ya Jumamosi.

Matokeo hayo yaliifanya Nigeria waliowafunga Kenya mabao 3-2 kufuzu Kombe la Dunia kutoka kundi la B.

Coelho alitoa lawama kwamba nyasi za bandia katika uwanja wa Maputo pamoja na joto kali vilisababisha kufungwa kwao.

Lakini lawama hizo hazikupenya masikioni mwa waziri wa michezo pamoja na maafisa wakuu wa Shirikisho la Soka la Tunisia wakati wa mkutano wao uliofanyika usiku wa Jumanne.

EU kuanza kuisaidia Somalia

Muungano wa Ulaya utaanza matayarisho ya kutoa mafunzo nchini Uganda kwa wanajeshi 2,000 wa Somalia.
Uamuzi huo ulipitishwa katika mkutano wa mawaziri wa mambo ya nje na ulinzi wa nchi za Ulaya uliofanyika mjini Brussels ni sehemu ya juhudi za kimataifa kuisaidia nchi hiyo inayokumbwa na vita kukabiliana na waasi wa Kiislamu na magenge ya kiharamia.


Muungano wa Ulaya unakusudia kuisaidia serikali dhaifu ya Somalia kuwafunza waliokua wanamgambo kuwa jeshi kamili la askari takriban elfu 6. Askari hao 2,000 kati ya hao watapewa mafunzo na wakufunzi 200 wa muungano wa Ulaya nchini Uganda inayoongoza jeshi la kimataifa la kulinda amani nchini Somalia.

Mataifa kadhaa ikiwemo Ujerumani na Hispania ziko tayari kuchangia mpango huo. Ufaransa tayari inatoa mafunzo kwa wanajeshi 500 wa Somalia katika kituo chao cha kijeshi Djibouti.

Lakini kuna wasiwasi EU inaweza kurudia makosa yale yale iliyoyafanya Afghanistan ambako ina matatizo ya kuwapata wakufunzi wa kutosha wa polisi na kuhakikisha utiifu wa vikosi vya kienyeji.