Kenya yawika mbio za mita 10,000

Mashindano ya 17 ya riadha barani afrika, yanaendelea katika uwanja wa Nyanyo mjini Nairobi.

Kenya ilianza mashindano hayo vyema kwa kutwaa medali ya dhahabu katika mbio za mita 10,000 kwa wanaume.

Wilson Kiprop, alihimili upinzani mkali kutoka kwa wanariadha wa Kenya, Uganda na mahasimu wa jadi Ethiopia, na kunyakuwa medali hiyo.

Uhasama uliotarajiwa kati ya wanariadha wa Kenya na Ethiopia haukujitokeza katika mbio hizo kwani Wakenya waliwika kuanzia mwanzo hadi mwisho.

Moses Kipsiro akiridhika na medali ya fedha naye Mkenya Geofrey Mutahi akimaliza katika nafasi ya tatu kuchukua shaba.

Katika shindano la kurusha tufe kwa upande wa wanaume, Afrika Kusini ilinyakua medali zote tatu.


Wlison Kiprop
Burger Lambrechts alishinda dhahabu, Roelof Potgieter na Orazio Cremona walimaliza katika nafasi ya pili na tatu na kutwa medali fedha na shaba.

Katika fainali ya mchezo wa hammer, Amy Sene wa Senegal alishinda medali ya dhahabu naye Hussein Marwa wa Misri akinyakuwa medali ya fedha. Florence Edem Apefa wa Togo aliridhika na nafasi ya tatu na kushinda medali ya shaba.

Orodha ya medali

Kufikia sasa Afrika Kusini inaongoza kwenye msimamo wa medali na jumla ya medali tatu, moja ya dhahabu, fedha na shaba.

Kenya ni ya pili na medali mbili moja ya dhahabu na moja ya shaba. Senegal na Uganda zinashikilia nafasi ya tatu na medali moja ya fedha kila mmoja.
Nchi zingine ambazo zimejizolea medali ni pamoja na Misri na Togo.

Mpambano Alhamisi

Shindano kuu siku ya Alhamisi ni fainali ya mbio za mita 5000 kwa kina dada ambapo wanariadha 15 watamenyana.

Meseret Defar, wa Ethiopia anatarajiwa kutwa medali ya dhahabu. Defar ndiye mwanariadha ambaye ameandikisha muda bora zaidi katika mbio hizo mwaka huu wa muda wa dakika 14.46.25.

Wanariadha wengine wanaotarajiwa kuumpa defar ushindani mkali ni pamoja na Sentayehu Ejugu, Vivian Cheruiyot na Ines Chenonge wote wa Kenya.

Miongoni mwa mashindano mengine yatakayofanyika leo ni pamoja na raundi ya kwanza ya mbio za mita mia nane kwa kina dada ambako mshindi wa medali ya fedha katika mashindano ya Olimpiki Janeth Jepkosgei atapambana na wanariadha Makkhanya Mapaseka wa Afrika Kusini na Sahalima Hachlaf wa Morocco, ambao wameandikisha muda wa chini ya dakika mbili na sekundi nne mwaka huu.

Mbio nyingine ambazo zinatarajiwa kuwa na upinzani mkali ni mbio za mita mia nane, kwa wanaume ambapo Wakenya David Rudisha na Alfred Kirwa watamenya katika nusu fainali.

Mwanariadha wa Sudan amabye alitarajiwa na wengi kushinda medali Abubakar Kaki, alijiondoa.

Moi aambiwa amheshimu Kibaki

Rais wa zamani wa Kenya Daniel Arap Moi ameambiwa na kamati ya kujenga usalama, kuwa amheshimu rais aliyeko madarakani, kufuatia wawili hao kushambuliana kwa maneno katika moja ya kampeni kuhusu katiba.


Daniel Arap Moi, Rais wa zamani wa Kenya


Rais Mwai Kibaki anataka wananchi wa Kenya kuupitisha muswada wa katiba mpya, huku Bw. Moi akiongoza kampeni ya kupinga katika hiyo.

Lakini kamati iliyoundwa ya kujenga utaifa imesema mzozo huo wa kibinafsi unaathiri kazi zake.

Baadhi wanahisi Kenya huenda ikarejea katika hali iliyotokea mwaka 2007 na 2008 baada ya kufanyika uchaguzi ambapo watu zaidi ya elfu moja waliuawa na wengine laki 3 kukosa makazi.


Rais Mwai Kibaki


Siku ya Alhamisi, Bw. Moi ambaye aliwahi kuwa rais wa Kenya kwa miaka 24 alisema Bw. Kibaki hatakiwi kumshutumu kwa kupinga muswada huo, kwa kuwa hakutimiza ahadi yake ya kubadili katika ndani ya siku 100, wakati alipoingia madarakani mwaka 2002.
Mwenyekiti wa Kamati hiyo ya kujenga utaifa (NCIC) Mzalendo Kibunjia amemtaka Bw. Moi kumheshimu rais na kutoa wito kwa Bw. Moi na Bw. Kibaki kujizuia kutoa matamshi ambayo yanaweza kusababisha mvutano katika kampeni za kura hiyo ya maoni.


Ghasia za mwaka 2007-8


Kura ya maoni itafanyika Agosti 4.

Watu wasiopungua sita waliuawa baada ya bomu la kurushwa kwa mkono kutupwa katika mkutano wa kampeni ya kupinga rasimu hiyo mwezi Juni mjini Nairobi, huku wabunge watano wakishitakiwa kwa kutoa matamshi ya chuki wakati wa kampeni hizo. Hatua hiyo ilifuatua malalamiko yaliyofikishwa kwa NCIC.

Ghasia nyingi za mwaka 2007-8 zilitokea wakati uhasama katika uchaguzi ulipozusha mizozo ya kugombea ardhi, hasa katika eneo la Bonde la Ufa, sehemu anayotoka Bw. Moi.

Moja ya kipengele katika rasimu ya katiba mpya, ni kuunda tume ya ardhi ambayo itataifisha ardhi iliyopatikana kwa njia zizozo halali wakati wa utawala wa rais Moi.

Wapiganaji wa Kisomali wasitisha maasi Ethiopia

Serikali ya Ethiopia leo inatarajiwa kusaini mkataba wa maridhiano kati yake na kundi la waasi la United Western Somali Liberation Front.

Kundi la UWSLF mwezi April mwaka huu lilikubali kuweka chini silaha zao baada ya mazungumzo ya siri kati yake na serikali ya mjini Addis Ababa. Kukubali kwa muafaka na serikali, kundi hilo linamaliza miongo miwili ya harakati za kijeshi dhidi ya serikali , wakati huo likiwa na nia ya kujitenga na Ethiopia.

Asili ya kundi hilo inahusishwa na kundi la Western Somali Liberation Front, ambalo wakati huo liliungana na majeshi ya Somalia dhidi ya Ethiopia katika vita vya Ogaden mwaka wa 1977.

Wakati huo wanachama wengi wa kundi hilo walikuwa Somalia, na hata baadhi yao kupatiwa nyadhifa mbali mbali serikalini kama mawaziri na hata maafisa waandamizi jeshini.

Serikali ya Ethiopia inayoongozwa na chama cha EPRDF cha Waziri Mkuu, Meles Zenawi, imekuwa ikipigana na makundi ya Kisomali katika jimbo la Ogaden, likiwemo kundi hili la UWSLF.

Kutia saini mkataba na kundi hili, kunamaanisha kuwa Ethiopia inajipunguzia mzigo wa mapambano na makundi ya waasi na kuweza kusaidia ujenzi na maendeleo katika jimbo la Ogaden lenye maendeleo duni nchini Ethiopia.

Wiki kadhaa zilizopita serikali ya Ethiopia iliweza kufanya mazungumzo na kundi la ONLF lililogawanyika, ambalo nalo linapigana na serikali kwa lengo la kukomboa mkoa wa Ogaden.

Lakini, kiongozi wa kundi hilo Gen Mohamed Omar Osman, amesema wajumbe waliofanya mazungumzo na serikali ya Ethiopia hawana ridhaa ya kundi hilo, na akaongeza kuwa baadhi ni wafungwa waliolazimishwa kuzungumza na vyombo vya habari.

Ikiwa serikali ya Ethiopia ina nia njema ya kumaliza vita katika jimbo la Ogaden huenda hatimaye makundi yaliyobaki ya waasi yakasalimu amri au kufikia muafaka na serikali, lakini hofu iliyopo ni kuwa uwezekano wa kuzuka kwa mapigano kati ya makundi ya waasi, haswa yale yaliyotia saini mkataba na serikali na yale yanayopinga.

Mahakama yapinga sheria ya uhamiaji Arizona

Jaji wa mahakama moja katika jimbo la Arizona nchini Marekani, amezuia kutekelezwa kwa vipengele tata vya sheria kuhusiana na uhamiaji ambavyo vilitarajiwa kuanza kutekelezwa leo.

Serikali kuu ya Marekani na makundi ya kutetea haki za binadamu wamepinga sheria hiyo ya uhamiaji ambayo ingesababisha watu kuchunguzwa zaidi.

Makundi kutoka Hispania yametaja sheria hiyo kama yenye ubaguzi.

Gavana wa jimbo hilo ambaye alipendekeza vipengele hivyo amesema kuwa atakata rufaa dhidi ya uamuzi huo wa mahakama.

Miongoni mwa vipengele hivyo ambavyo kwa sasa vinatakiwa kuondolewa katika sheria hiyo ni kile ambacho kiliwataka maafisa wa polisi kuwahoji watu kuhusu hadhi yao ya uhamiaji watakaposimamishwa kihalali, hatua ambayo Rais Obama ameielezea kuwa ni ya upotoshaji na ubaguzi dhidi ya raia wa kigeni, hususan wa makundi ya kutoka Amerika ya Kusini.

Ajali ya ndege yaua watu 152 Pakistan

Ndege ya abiria imeanguka huko Islamabad, mji mkuu wa Pakistan na kuua watu wote 152 waliokuwa ndani yake.

Ndege hiyo, iliyokuwa katika safari kutoka Karachi kwenda Islamabad inaendeshwa na kampuni binafsi ya Airblue, ilianguka kwenye vilima vilivyoko kaskazini mwa jiji wakati ikijiandaa kutua.
Eneo la ajali hakifikiki kwa njia ya barabara, waokoaji walitumia mikono mitupu kufukua mabaki ya ndege.

Bofya Bofya hapa kuangalia picha zaidi

Hapakuwa na taarifa za awali kubaini chanzo cha ajali. Ingawa imeelezwa eneo hilo lilikuwa limetandwa na ukungu.

Televisheni za Pakistan zilionyesha picha za mabaki ya ndege yakiwaka moto, huku helikopta za uokoaji zikiranda juu.Tathmini
Airblue ndiyo kampuni kubwa zaidi ya ndege binafsi, miongoni mwa mashirika yaliyoibuka nchini Pakistan katika miaka ya karibuni.

Kampuni hiyo na idara ya usimamizi wa safari za anga hawadhani ndege hiyo ilikutwa na matatizo ya kiufundi wakati ikiondoka Karachi.>Wanasema hapakuwa na dalili za hitilafu ya kiufundi katika mawasiliano kati ya rubani na mnara wa kuongozea ndege wa Karachi.

Hata hivyo, maafisa wa uwanja wa ndege waliieleza BBC kuwa ndege mbili zilizokuwa zitue kwenye mji huo mkuu zilikataliwa kabla ya ajali hiyo ya Airblue, katika ajali kubwa zaidi ya ndege kuwahi kutokea nchini Pakistan.

Ingawa sekta ya safari za anga imekuwa kwa kasi, wakosoaji wanasema viwango vimekuwa chini na haviendani na ukuaji wa huduma.

Marubani hulalamika wanalazimishwa kuruka kwa saa za ziada, jambo linalosababisha uchovu, ingawa mashirika ya ndege yanakana madai hayo.


Ramani kuonyesha maeneo yanayohusiana na ajali ya ndege nchini Pakistan.


Jangwa kubwa

Imtiaz Elahi, mwenyekiti wa Capital Development Authority, mamlaka inashughulikia dharura, alisema ajali hiyo "inavunja moyo".

"Ni janga kubwa, na ninaweza kuthibitisha kwa uchungu kwamba hapakuwa na watu waliosalimika," alilieleza shirika la habari la Associated Press.

Ndege hiyo, inayosemekana kuwa ni muundo wa Airbus A321 ikiwa na abiria 146 na wafanyakazi sita ndani yake, inaaminika kuwa iliondoka Karachi saa mbili kasorobo asubuhi majira ya huko.

Hakuna walionusurika

Awali, Wizara ya mambo ya ndani ya Pakistan, ilisema watu wasiopungua watano walikuwa wamenusurika kifo na kupelekwa hospitalini, lakini maafisa wa maeneo hayo baadaye walisema taarifa hizo hazikuwa sahihi.

Televisheni za maeneo hayo zilionyesha vipande vya mabati na chuma vikining'inia kutoka juu ya miti na kutapakaa ardhini.Kifaa cha kutunza kumbukumbu za safari kimekwishapatikana.

Maafisa wanasema waokoaji waliokuwa wakitafuta watu walionusurika, walikuwa wakitumia mikono mitupu kufukua mabaki hayo. Eneo la ajali lililoko kwenye mlima mkali, halifikiki kwa barabara

Bennet: Zimbabwe inatawaliwa kijeshi

Mmoja wa wabunge wa bunge la Zimbabwe, Roy Bennett, ambaye ni mzungu ameiambia BBC kuwa anaamini kwa sasa Zimbabwe inaendeshwa na utawala wa kijeshi.

Bwana Bennett, ambaye ni mshirika wa karibu wa waziri mkuu, Morgan Tsvangirai, amesema anaamini Rais Mugabe analazimishwa na jeshi kuendelea kutawala nchi hiyo.


Rais Mugabe amedaiwa kuliachia jeshi uongozi
Bwana Bennett, ambaye ni mkulima wa zamani, amezuiliwa kuchukua wadhifa wa unaibu waziri wa kilimo katika serikali ya umoja wa kitaifa kutokana na taratibu za kisheria zinazorudiwa rudiwa.

Matamshi hayo yametolewa wakati ambapo mpango wa kukusanya maoni kuhusu katiba mpya nchini Zimbabwe umegubikwa na taarifa za ghasia katika eneo la jimbo la magharibi la Mashonaland.

Kuna madai kwamba watu wanalazimishwa kuhudhuria mikutano ya usiku, na watu maalum huteuliwa kutoa maoni ambayo hufanana na msimamo wa chama cha ZANU PF cha Rais Robert Mugabe.

Wafuasi wa chama cha Movement for Democratic Change or MDC wanasemekana kuzuiwa kuhudhuria mikutano hiyo ya kutoa maoni. Wengine wameripotiwa kulazimishwa kuhama jimbo hilo.

Rais Kibaki amtaka mtangulizi wake kutopinga mageuzi

Huku kampeini za kura ya maoni dhidi ya rasimu ya katiba mpya nchini Kenya zikipamba moto Rais Mwai Kibaki amemkosoa vikali mtangulizi wake Daniel Arap Moi kwa kuendeleza kampeini za kupinga rasimu hiyo.

Akiongea katika mkutano wa kupigia debe katiba kielelezo Mashariki mwa Kenya, Kibaki bila kutaja jina alisema baadhi ya watu wanaopinga katiba wanajiabisha na wamejawa na woga kuona Kenya ikipata katiba mpya.

Kwa maneno yake Kibaki alisema katika mhadhara huko Kirinyaga,''Wazee wengine wanazunguka wakisema katiba ni mbaya.... Ni aibu kubwa kwa wazee kama hawa. Awache wasi wasi na aungane na sisi tupitishe katiba''.

Hii ndiyo mara ya kwanza Rais Kibaki amemkosoa hadharani mtangulizi wake Bw.Moi tangu kuchukua hatamu za uongozi kwa miaka saba sasa.Kibaki japo hakuonekana na ghadhabu yeyote wakati akitoa matamshi hayo alimsihi Moi kuachana na kampeini zake kupinga katiba mpya ili aweze kupata heshima kwa raia wa Kenya.

Wadadisi wanasema Moi ndiye kiongozi aliyestaafu Afrika ambaye ameendelea kuwa na kasi ya kupiga siasa. Katika kura ya maoni iliyopita dhidi ya katiba mpya mwaka 2005, Moi alijiunga na mrengo wa chungwa ambao ulipinga rasimu ya katiba.

Msimamo wa Moi juu ya mageuzi ya katiba haujabadilika na kwa wakati huu ameweza kufadhili kampeini kali nchini Kenya ambapo ameungana na mrengo wa rangi nyekundu unaopinga katiba kielelezo.